... ही तर अनुभवाची वनराई!

April 08, 2022 ... ही तर अनुभवाची वनराई!

लोकमत अकोला आवृत्तीच्या रौप्य महोत्सवी वर्षात शहरातील विविध क्षेत्रातील 25 संस्थांच्या पदाधिकारिंशी संवाद साधण्याचा प्रकल्प हाती घेतला आहे. याची सुरुवात ज्येष्ठ नागरिकांपासून केली. आज अनेक घरातील ज्येष्ठांमध्ये ते अडगळीत पडल्याची भावना घर करून आहे. मुले सुना कामाधंद्यात व्यस्त आहेत तर नातवंडे शाळेत. अशात ज्येष्ठांकडे काहीसे दुर्लक्षच होते. सर्वांच्याच वाट्यास हाच अनुभव येतो असे नाही, मात्र अनेकांच्या बाबतीत तसे होते हे खरे. तेव्हा त्यांची काळजी घ्यायची असेल तर औषध उपचारापेक्षा त्यांना सन्मान मिळणे गरजेचे आहे. त्यांच्या जीवनात येऊ पाहणारे एकटेपण दूर होणे अपेक्षित आहे. कामा धंद्यावरून अगर नोकरीवरून घरी परतल्यावर मुलांनी काही वेळ त्यांच्यासोबत घालवला व दिवसभरातील हालहवाल त्यांच्या कानी घातले तर त्यातून त्यांना मिळणारे समाधान कितीतरी अधिक असेल. शारीरिकदृष्ट्या भलेही ते ज्येष्ठ, सेवानिवृत्त झाले असतील; पण मनाने ते तरुण आहेत. अनेक उन्हाळे-पावसाळे पाहून गाठीशी बांधलेल्या अनुभवाचे संचित त्यांच्यापाशी आहे. त्या अनुभवांच्या वनराईत नव्या पिढीला जो गारवा अनुभवयास मिळेल तो कुठल्याही सल्ला केंद्रावर पैसे मोजूनही मिळणार नाही. कुटुंबाला, समाजाला अशी छाया देणारी ही वनराई जपुया, त्यांचा सन्मान राखूया... ज्येष्ठांप्रतीच्या या सन्मानाच्या व कृतज्ञतेच्या भावनेतूनच या प्रकल्पाचा प्रारंभ त्यांच्यापासून केला गेला. यावेळी खूप गप्पा झाल्या, नारायणराव अंधारे यांनी त्यांचे कैवल्याचे लेणे हे पुस्तकही भेट दिले. ज्येष्ठांचा हा आशीर्वाद आम्हास ऊर्जा देऊन गेला ... #LokmatAkola #KiranAgrawal #AkolaSeniorCitizen #LokmatSamwadAkola