Dr. Dhole visit 2026

04 July, 2026

आपल्या नेहमीच्या कामकाज क्षेत्रापलीकडील व्यक्तींच्या भेटी या खूप काही शिकवून तर जातातच, शिवाय त्यातून नवे मित्र जोडल्याचा आनंदही लाभून जातो. प्रसिद्ध विज्ञान कथा लेखक व भौतिकशास्त्रज्ञ, प्रोफेसर डॉ. संजय ढोले यांच्याशी झालेली भेट ही त्यापैकीच एक. जळगाव येथील विद्यापीठाच्या कामानिमित्त आलेले डॉ. ढोले हे लोकमतचे विज्ञान कथा लेखक म्हणून असलेली नाळ जपत खास भेटीसाठी आले. पुणे येथील ज्ञान प्रसार ग्लोबल विद्यापीठात संचालकपदी कार्यरत असलेले डॉ ढोले यांच्या 14 विज्ञानकथा कादंबऱ्या प्रकाशित झाल्या असून सुमारे चारशेच्या आसपास संशोधन निबंध विविध राष्ट्रीय आंतरराष्ट्रीय जर्नलमधून प्रकाशित झाले आहेत. तसे ते मूळचे नंदुरबार जिल्ह्यातील. अमळनेरमध्येही शिक्षण झालेले, त्यामुळे इकडची ओढ व भावनिकता पदोपदी जाणवत होती. सध्याची एकूणच शैक्षणिक व्यवस्था व त्यातील आव्हाने याविषयी त्यांच्याशी खूप छान चर्चा झाली. जळगाव येथील डॉ. बेंडाळे महिला महाविद्यालयातील प्रा. डॉ. रवींद्र बावने यांच्यामुळे हा योग घडून आला. #LokmatJalgaon #KiranAgrawalLokmatJalgaon